შანხაის ფუდანის უნივერსიტეტის მეცნიერებისა და ტექნოლოგიების ინსტიტუტმა ინოვაციური მოწყობილობა წარმოადგინა რომელიც დაზიანებული ზურგის ტვინის მქონე ადამიანებს საშუალებას მისცემს ქვედა კიდურების კუნთებზე კონტროლის აღდგენაში. ეს ტექნოლოგია მნიშვნელოვანი ნაბიჯია სამედიცინო ინჟინერიისა და ნერვული სისტემის აღდგენითი მედიცინის სფეროში.
„ჩვენ შევიმუშავეთ ახალი თაობის მოწყობილობა, რომელიც უზრუნველყოფს მაღალი სიზუსტის ინტერფეისს თავის ტვინსა და ზურგის ტვინს შორის, აქვს მაღალი გამტარობა და დაბალი შეყოვნება“ – ამბობს ჯია ფუმინი, პროექტის წამყვანი მკვლევარი.
ზურგის ტვინი ნერვული სისტემის უმნიშვნელოვანესი ნაწილია, ის პასუხისმგებელია კუნთების კონტროლზე. მისი დაზიანება, მაგალითად, უბედური შემთხვევის შედეგად, იწვევს პარალიზებას, რადგან ნერვული სიგნალები ვერ აღწევს ქვედა კიდურებამდე. ზურგის ტვინის სტიმულაციის მოწყობილობა სწორედ ამ პრობლემის გადაჭრის მიზნით შეიქმნა.
ახალი ტექნოლოგია გულისხმობს ელექტროდების იმპლანტაციას როგორც თავის ტვინში, ისე ზურგის ტვინში, რაც ხელს უწყობს კავშირის აღდგენას მათ შორის. მეცნიერების თქმით, მოწყობილობა ამცირებს პარალიზებული პაციენტების დამოკიდებულებას ტრადიციულ მკურნალობაზე, ხოლო მისი გამოყენებით შესაძლებელი იქნება სიარულის უნარის ნაწილობრივი აღდგენა.
მოწყობილობის განსაკუთრებული მახასიათებელია მისი უნარი ზუსტად გაააქტიუროს ზურგის ტვინის ნერვული დაბოლოებები და მონაცვლეობით გაააქტიუროს ქვედა კიდურების კუნთების შესაბამისი ჯგუფები. ამ პროცესის საშუალებით პაციენტი უფრო ბუნებრივად ივლის. სისტემა ადაპტირდება პაციენტის მოძრაობის პარამეტრებთან და კორექტირებას ახდენს ზურგის ტვინის სტიმულაციაზე რეალურ დროში, რაც მნიშვნელოვნად აუმჯობესებს შედეგებს.
მეცნიერებმა უკვე დააანონსეს, რომ კლინიკური კვლევები ამ მოწყობილობასთან დაკავშირებით დაიწყება მიმდინარე წლის ბოლოს, ჩინეთის ერთ-ერთ სპეციალიზირებულ კლინიკაში. წარმატებული კვლევების შემთხვევაში, ეს ტექნოლოგია მნიშვნელოვნად შეცვლის ზურგის ტვინით დაზიანებული პაციენტების მკურნალობის მეთოდებს და გახდება კიდევ ერთი ნაბიჯი პარალიზის საწინააღმდეგო ინოვაციებში.
#drpkhakadze #davidiani #shenistartup
