საქართველოს ეროვნულ ბანკში ფინანსური სტაბილურობის კომიტეტის სხდომა გაიმართა, სადაც რამდენიმე მნიშვნელოვანი გადაწყვეტილება მიიღეს. ცენტრალური ბანკის განცხადების მიხედვით, ცვლილებები შეეხება ფიზიკურ პირებზე ლარში გაცემულ უძრავი ქონებით უზრუნველყოფილ სესხებს. კერძოდ, სესხის უზრუნველყოფის კოეფიციენტი 5 პროცენტით გაიზრდება და 90%-ს მიაღწევს.
ამ ცვლილების მიხედვით, საქართველოს მოქალაქეებს, ვინც ბინის შეძენას გეგმავენ, პირველადი შენატანის სახით აღარ მოუწევთ ბინის ღირებულების 15%-ის გადახდა, არამედ მხოლოდ 10%-ის გადახდა იქნება საჭირო. ეს ზომა ხელს შეუწყობს იპოთეკური სესხების ხელმისაწვდომობას და უძრავი ქონების ბაზარზე აქტივობის გაზრდას. ასევე, სესხის უზრუნველყოფის კოეფიციენტი გაიზრდება 10%-ით, 80%-მდე, მათთვის, ვინც საქართველოს ფარგლებს გარედან შემოსავალს იღებს.
მომდევნო რამდენიმე თვის განმავლობაში, ეროვნული ბანკი განაგრძობს საკრედიტო აქტივობის მონიტორინგს და ეკონომიკური ზრდის ეტაპობრივი ნორმალიზების ფონზე, სესხების მაჩვენებლები ეტაპობრივად უახლოვდება გრძელვადიან დონეს.
„2025 წლის იანვრის მონაცემებით, საბანკო სექტორი კაპიტალისა და ლიკვიდობის ჯანსაღ მაჩვენებლებს ინარჩუნებს. 2025 წლის იანვარში, სესხების წლიურმა ზრდამ, გაცვლითი კურსის ეფექტის გამორიცხვით, 18.1% შეადგინა, რაც მეტწილად, ბიზნეს სესხების ზრდით იყო განპირობებული. 2024 წლის მეოთხე კვარტლის მონაცემებით, სესხების მთლიან შიდა პროდუქტთან ფარდობა გრძელვადიანი ტრენდის ქვემოთ ნარჩუნდება. გასული წლის მანძილზე არსებულმა ძლიერმა ეკონომიკურმა ზრდამ სესხების მშპ-თან ფარდობის გაპის დახურვის ტემპი შეანელა, თუმცა სესხების მშპ-თან ფარდობა განაგრძობს მის გრძელვადიან დონესთან ეტაპობრივ დაახლოებას.
კომიტეტის შეფასებით, საკრედიტო აქტივობის არსებული დინამიკის შენარჩუნებისა და ეკონომიკური ზრდის ეტაპობრივი ნორმალიზების ფონზე, სესხების მშპ-თან ფარდობის უარყოფითი გაპი 2025 წლის პირველ ნახევარში დაიხურება. ამასთან, ეკონომიკური აქტივობის ნორმალიზების ფონზე, უძრავი ქონების ბაზარზე მდგრადი აქტივობის შენარჩუნების მიზნით, ეროვნული ბანკი სესხის უზრუნველყოფის კოეფიციენტის (LTV) მაქსიმალურ მაჩვენებელს ფიზიკურ პირებზე ლარში გაცემული უძრავი ქონებით უზრუნველყოფილი სესხებისთვის დროებით 5 პროცენტული პუნქტით, 90%-მდე, ზრდის. ასევე, 10 პროცენტული პუნქტით, 80%-მდე, გაიზრდება სესხის უზრუნველყოფის კოეფიციენტი იპოთეკურ სესხებზე საქართველოს ფარგლებს გარედან შემოსავლის მიმღებთათვის. აღნიშნული ცვლილებები ხელს შეუწყობს იპოთეკურ სესხებზე ხელმისაწვდომობის გაზრდას.
მიმდინარე ეტაპზე კაპიტალის კონტრციკლური ბუფერის ციკლური კომპონენტის ცვლილების საჭიროება არ იკვეთება. კომერციული ბანკები განაგრძობენ კაპიტალის კონტრციკლური ბუფერის ნეიტრალური კომპონენტის ეტაპობრივ დაგროვებას”, – ნათქვამია ეროვნული ბანკის ინფორმაციაში.
#drpkhakadze #გიორგიფხაკაძე #davidiani #shenistartup #აქხარისხია
მასალის გამოყენების პირობები
