სახელმწიფო აუდიტის სამსახურმა ციფრული ჯანდაცვის აუდიტის ანგარიში გამოაქვეყნა, რომელიც მიუთითებს, რომ საქართველოში რეცეპტს დაქვემდებარებული მედიკამენტების ურეცეპტოდ გაცემის მაჩვენებელი საგრძნობლად მაღალია. ეს ფაქტი 2022-2023 წლებში, საერთო ჯამში, 67%-ს შეადგენს და გამოიწვია 1,822,100 ლარის ოდენობის ჯარიმის დაწესება.
აუდიტის მიხედვით, ქვეყანაში განხორციელდა 1,875 კონტროლის ღონისძიება, რომელთა 98%-ში (1,747 შემთხვევა) გამოვლინდა რეცეპტს დაქვემდებარებული წამლების ურეცეპტოდ გაცემის ფაქტები. როგორც აღმოჩნდა, ფარმაცევტული პროდუქტის რეალიზაციის წესების დარღვევამ ჯარიმის დაკისრება გამოიწვია, რაც კანონით მკაცრად რეგულირდება.
რეგულირების სააგენტოს განმარტებით, შეზღუდული რესურსების გამო შეუძლებელია ყველა სამედიცინო დაწესებულების შემოწმება ელექტრონული რეცეპტების სისტემის ფარგლებში. გარდა ამისა, არ არის შემუშავებული საკმარისი მექანიზმები, თუ როგორ მოხდება სამედიცინო დაწესებულებების და პერსონალის შემოწმება და რეცეპტების სისტემის ვადების დაცვა.
აუდიტი ასევე აღნიშნავს, რომ ქვეყანაში დაბალია როგორც პროფესიულად აქტიური სამედიცინო პერსონალის, ისე სამედიცინო დაწესებულებების ჩართულობის მაჩვენებელი ელექტრონულ სისტემებში. ამას ემატება, რომ EHR სისტემაში არ არის ჩართული პირველადი ჯანდაცვის სამედიცინო პერსონალი, რაც დიდ გავლენას ახდენს პაციენტების სრულფასოვან მკურნალობაზე.
დოკუმენტის მიხედვით, 2023 წლისათვის, EHR სისტემაში არ განხორციელებულა ზედამხედველობის ღონისძიებები, რაც ხელს უშლის სისტემის ეფექტიან ფუნქციონირებას და უწყობს ხელს ინფორმაციის სისრულის რისკებს.
რეკომენდაციები სამინისტროს და რეგულირების სააგენტოს:
ელექტრონული ჩანაწერების სისტემაში ჩართული მომხმარებლებისათვის მუდმივად განახლებად და სრულ მონაცემებზე წვდომის მიზნით შემუშავდეს ეფექტიანი ზედამხედველობის მექანიზმი, რომელიც გაზდის ექიმებისა და სამედიცინო დაწესებულებების ჩართულობას, რითაც გააუმჯობესებს პაციენტის ჯანმრთელობის შესახებ არსებული ინფორმაციის დროულად და სრულად ასახვის მაჩვენებელს.
რეკომენდაცია რეგულირების სააგენტოს:
ელექტრონული რეცეპტის სისტემის ეფექტიანად ამოქმედების მიზნით, შემუშავდეს ისეთი ზედამხედველობის მექანიზმი, რომელიც შეამცირებს რეცეპტს დაქვემდებარებული მედიკამენტების ურეცეპტოდ გაცემის შესაძლებლობას.
ინფორმაციისთვის: 2016 წლიდან დაიწყო ელექტრონული რეცეპტების (E-prescription) დანერგვა, ხოლო 2019 წლიდან − ჯანმრთელობის შესახებ ელექტრონული ჩანაწერების სისტემისა (EHR). ამჟამად, ყველა სტაციონარული/ამბულატორიული დაწესებულება ვალდებულია პაციენტის ვიზიტის სამედიცინო შემთხვევის შესახებ ასახოს ინფორმაცია სისტემაში და ასევე ყველა დანიშნული, რეცეპტს დაქვემდებარებული მედიკამენტი გამოწეროს ელექტრონული რეცეპტით. თავის მხრივ, ყველა აფთიაქი ვალდებულია ამ უკანასნელი ტიპის ფარმაცევტული პროდუქტი გასცეს მხოლოდ ელექტრონული რეცეპტის საფუძველზე.
#drpkhakadze #გიორგიფხაკაძე #davidiani #shenistartup #აქხარისხია
