ქუთაისში, 2025 წლის შემოდგომაზე, საქართველოს პირველი ტექნოლოგიური ჰაბი გაიხსნება. ეკონომიკის სამინისტროს ინოვაციებისა და ტექნოლოგიების სააგენტოს ხელმძღვანელმა, ავთანდილ კასრაძემ განაცხადა, რომ პროექტი წარმატებით ვითარდება და ყველა მნიშვნელოვანი ინფორმაცია საზოგადოებას გამჭვირვალედ მიეწოდება.
კასრაძის თქმით, ამ ეტაპზე აქტიურად მიმდინარეობს გარე ინფრასტრუქტურული სამუშაოები. უკვე დასრულებულია დასავლეთის შესასვლელის საავტომობილო გზის, სკვერის, მწვანე საფარის და გარე განათების მოწყობა. ასევე, აქტიურ ფაზაშია გათბობა-გაგრილების სისტემებისა და საინჟინრო კომუნიკაციების რეაბილიტაცია, ხოლო ინტერიერის დიზაინზე მუშაობა გრძელდება.
აღსანიშნავია, რომ ტექნოლოგიურ ჰაბში იგეგმება ინტერაქციული სამეცნიერო და ტექნოლოგიური მუზეუმის მოწყობა. მუზეუმი პირველი ვიზიტორების მიღებას 2025 წლის შემოდგომაზე დაიწყებს, სადაც უკვე შეძენილია 50-მდე ექსპონატი.
„რაც შეეხება ხელოვნურ ტბას, ამ ეტაპზე არ ხდება მისი წყლით ავსება. მოგეხსენებათ, რომ გარე ხელოვნურ ტბას არასოდეს უფუნქციონერია საქართველოს პარლამენტის მუშაობის დროს, თუმცა, ჩვენ გადავწყვიტეთ, აღვადგინოთ ეს ტბა, აქედან გამომდინარე, ჭაბურღილს უკვე ჩაუტარდა შესაბამისი სამუშაოები, დავასრულეთ მისი გაწმენდაც და ახლა მიმდინარეობს წყლის მცირე ნაკადით მიწოდება იმისთვის, რომ დადგინდეს წყლის ხარისხი. ამ წყალს ჩაუტარდება ლაბორატორიული კვლევები და აქედან მიღებული შედეგებიდან გამომდინარე, უკვე მოხდება მისი ნაკადის გაზრდა და მთლიანად შეივსება გარე ხელოვნური ტბა“ – აღნიშნა სააგენტოს ხელმძღვანელმა.
მისივე თქმით, შენობის შიგნით, განსაკუთრებით მაღალი ტემპერატურა და უჟანგბადობა პრობლემებს იწვევდა, რის გამოც, უკვე რამდენიმე თვეა, მიმდინარეობს შენობის გაგრილების სისტემის სრულუ რეაბილიტაცია და ახალი სიმძლავრეებისა და იატაკის გაგრილების დამატება.
მომავალი ტექნოლოგიური ჰაბი ასევე მოიცავს ერთ-ერთ უდიდეს საკონფერენციო დარბაზს, სტარტაპებისთვის საერთო სამუშაო სივრცეს და სატრენინგო ოთახებს, რაც ხელს შეუწყობს ინოვაციებისა და ტექნოლოგიების განვითარებას.
#drpkhakadze #გიორგიფხაკაძე #davidiani #shenistartup #აქხარისხია
