2025 წლის 1-ლი იანვრიდან, საქართველოს მოქალაქეებისთვის სესხის აღების წესი განახლდა. ეროვნული ბანკის პრეზიდენტის მოვალეობის შემსრულებლის ნათია თურნავას ბრძანების მიხედვით, მოქალაქეები, რომლებიც შემოსავალს ლარში იღებენ, 500 000 ლარამდე სესხის აღებას მხოლოდ ლარში შეძლებენ. ეს ნიშნავს, რომ ამ თანხის ფარგლებში სესხი უცხოურ ვალუტაში აღარ გაიცემა. შესაბამისად, ის ადამიანები, რომელთაც ადრე სესხი მაგალითად, დოლარში ჰქონდათ აღებული, მომავალში მხოლოდ ლარში შეძლებენ სესხის მიღებას აღნიშნულ თანხაში.
ამ ცვლილებასთან დაკავშირებით, საკანონმდებლო მაცნეზე ნათია თურნავას ბრძანება უკვე გამოქვეყნდა.
„სესხის გამცემი ორგანიზაციების მიერ 500 ათას ლარამდე სესხი/საბანკო კრედიტი უნდა გაიცეს მხოლოდ ლარით. ლარით გაცემულ სესხად/საბანკო კრედიტად არ მიიჩნევა ნებისმიერი ფორმით უცხოურ ვალუტაზე მიბმული ან ინდექსირებული სესხი/საბანკო კრედიტი“.
თუმცა, ამ მუხლის პირველი პუნქტით გათვალისწინებული მოთხოვნები არ ვრცელდება, თუ:
სესხის/საბანკო კრედიტის გაცემის შედეგად თითოეული მსესხებლის ჯამური ვალდებულებები ამავე გამსესხებლის მიმართ 500 000 ლარს აღემატება. ჯამური ვალდებულებების დათვლისას არ უნდა იქნეს გათვალისწინებული ფულადი სახსრებით უზრუნველყოფილი ან/და თავდებობით ნაკისრი ვალდებულებები;
სესხი/საბანკო კრედიტი გაიცემა საქართველოს მოქალაქეობის არმქონე პირზე ან/და საქართველოში არარეგისტრირებულ იურიდიულ პირზე;
სესხი/საბანკო კრედიტი სრულად არის უზრუნველყოფილი ფულადი სახსრებით იმავე ვალუტაში;
სესხების/საბანკო კრედიტების გადასახდელად საკმარის შემოსავალს მსესხებელი სრულად იღებს სესხის/საბანკო კრედიტის შესაბამის ვალუტაში. შემოსავალი ჩაითვლება სესხის/საბანკო კრედიტის შესაბამის ვალუტაში მიღებულად, თუ შემოსავლის წყარო სესხის/საბანკო კრედიტის ვადიანობის განმავლობაში არ არის მგრძნობიარე გაცვლითი კურსის მერყეობის მიმართ და მისი წარმოშობის წყარო დაკავშირებულია ისეთ ქვეყანასთან, რომელშიც სესხის/საბანკო კრედიტის ვალუტა არის ეროვნული ვალუტა. ამ ქვეპუნქტის მიზნებისთვის, სამეწარმეო მიზნობრიობით გაცემული სესხის/საბანკო კრედიტის შემთხვევაში, სესხის გამცემი ორგანიზაციის შიდა პოლიტიკა-პროცედურებით განსაზღვრული სესხის/საბანკო კრედიტის მომსახურების ჯანსაღი კოეფიციენტი სრულად დაცული უნდა იყოს სესხის/საბანკო კრედიტის ვალუტაში არსებული შემოსავლით;
ხორციელდება სესხის/საბანკო კრედიტის იმავე ვალუტაში რეფინანსირება/საყურადღებოდ მოდიფიცირება/რესტრუქტურიზაცია და იმავდროულად არ იზრდება მსესხებლის არსებული ვალდებულებების მოცულობა. ვალდებულებების მოცულობის ზრდად არ ითვლება სესხზე/საბანკო კრედიტზე დარიცხული და გადაუხდელი პროცენტის, საკომისიოს, პირგასამტეხლოსა და ნებისმიერი სხვა ფორმის ფინანსური სანქციის კაპიტალიზაცია, ასევე, ნოტარიუსის, საჯარო რეესტრის ეროვნული სააგენტოს მომსახურების ხარჯები ან/და სესხთან/საბანკო კრედიტთან დაკავშირებული სხვა ხარჯი,”- ნათქვამია დოკუმენტში.
მსგავსი გადაწყვეტილება ეროვნულმა ბანკმა 2024 წელს ერთხელ უკვე მიიღო. კერძოდ, 2024 წლის მაისიდან პირები, რომელთაც შემოსავალი ლარში ჰქონდათ 400 ათას ლარამდე სესხს ვეღარ იღებდნენ უცხოურ ვალუტაში.
#drpkhakadze #გიორგიფხაკაძე #davidiani #shenistartup #აქხარისხია
