მედიაჰოლდინგ “შენის” მორიგი სტუმარი თანამედროვე მეზღაპრე ლიზი ბაზერაშვილია, უფრო ცნობილი თავისი ფეისბუქ გვერდითა და youtube არხით “თბილელეთის ზღაპრები”…
ლიზი თავად ქმნის ამ საოცარ სამყაროს პატარებისათვის, ხელოვნური ინტელექტის დახმარებით. რა გზას გადის ზღაპარი პატარების გულამდე; რამდენად შრომატევადია ეს პროცესი და რა არის ნოვატორი მეზღაპრის საბოლოო მიზანი?- შეიტყობთ ინტერვიუდან:
– ლიზი, გაეცანი ჩვენს მკითხველს…
– მე ვარ ლიზი ბაზერაშვილი, 31 წლის. პროფესიით ქართულის ენის ფილოლოგი. ვმუშაობ საბავშვო ბაღში აღმზრდელად. გახლავართ თბილელეთის ზღაპრებისშემქმნელი.
– როდის დაიწყეთ ზღაპრების წერა და რა იყო ინსპირაციის წყარო?
– ზოგადად, დიდი ხანია, რაც ვწერ მოთხრობებს და ჩანახატებს, მაგრამ კონკრეტულად, საბავშვო ზღაპრების წერა დავიწყე დაახლოებით ერთი წლის წინ. წერდე ბავშვებისთვის – ეს უდიდესი პასუხისმგებლობა და თან უდიდესი მადლია. მინდოდა, დამეწერა ისეთი ზღაპრები, რომლებიც ბავშვებს, ყველაზე გულწრფელ არსებებს დედამიწაზე, ისეთ ჯადოსნურ სამყაროს შეუქმნიდა, სადაც ისინი საყვარელ პერსონაჟებთან ერთად იმოგზაურებდნენ და ისწავლიდნენ სიკეთეს, მეგობრობას, საკუთარი თავის რწმენას, შიშების დამარცხებას…
– თქვენს Youtube არხზე გვიამბეთ, რამდენი ზღაპარია განთავსებული და რა რაოდენობის აუდიტორიას ფლობთ?
– ჩემი Youtube არხი შეიქმნა 2024 წლის 13 დეკემბერს. ჯერჯერობით მყავს 900-მდე გამომწერი.
– რა ასაკის ბავშვებისთვისაა თქვენი ნაწარმოებები გათვლილი?
– ჩემი ზღაპრები გათვლილია სკოლამდელი ასაკის ბავშვებისა და დაწყებითი საფეხურის მოსწავლეებისთვის.
– რა განასხვავებს ამ ზღაპრებს კლასიკური ზღაპრებისგან?
– ტრადიციული ქართული ზღაპრების დასასრული „ჭირი იქა, ლხინი აქა, ქატო იქა, ფქვილი აქა“ შევცვალე სიტყვებით „ჭირი არსად, ლხინი აქა, ქატო არსად, ფქვილი აქა“. ასევე, შევიტანე თანამედროვე ელემენტები და მცირედი ფენტეზის ჟანრიც გამოვიყენე.
– რამდენად შრომატევადია? მარტო მუშაობთ თუ გუნდთან ერთად?
– თავიდან ეს პროექტი მე და ჩემმა ძმამ დავიწყეთ. ამჟამად, უკვე მარტო ვმუშაობ. დიახ, ნამდვილად შრომატევადია, მაგრამ ძალიან სასიამოვნო. ჯერ ვწერ ზღაპარს, შემდგომ ვყოფ სიუჟეტებად და ვიწყებ ხელოვნურ ინტელექტთან მუშაობას და სიუჟეტების დახატვას. შემდგომ, ვიწერ თითოეული სიუჟეტის ხმას. მერე ვეძებ შესაფერის მელოდიას და ბოლოს, ვიდეოს ვამონტაჟებ.
– რა არის თქვენი მიზანი? როგორ გამოიყურება თქვენი სამომავლო გეგმები?
– ჩემი მიზანია, “თბილელეთის ზღაპრები” გავხადო ბევრად უფრო ცნობადი, ვიდრე ახლაა. მინდა დავაგროვო ზღაპრების გარკვეული რაოდენობა, საბოლოო მიზანი და ოცნება წიგნის გამოშვებაა, წიგნი სახელად “თბილელეთის ზღაპრები”, რომელსაც ჩემს ნაადრევად “გაფრენილ” მამიკოს ხსოვნას მივუძღვნი.
– წარმატებებს გისურვებთ.
ავტორი – თამარ ფიცხელაური
#drpkhakadze #გიორგიფხაკაძე #pitskhelauri #აქხარისხია
გაიგეთ მეტი ჩვენს ტელეგრამ არხზე შემოგვიერთდით ტელეგრამზე: https://t.me/SheniEkimi
