ინტერვიუ ახალგაზრდა ხელოვანთან, რომელიც ძველი ავეჯისგან ჯადოსნურ ნამუშევრებს ქმნის – გაიცანით დიზაინერი, სოფო მგალობლიშვილი

Sheniinterieri.ge გაგაცნობთ ახალგაზრდა მხატვარს, რომლის ჰობი ახალ პროფესიად იქცა – ავეჯის რესტავრირება/გაცოცხლება, ინტერიერის დიზაინი… სოფო ძველი ავეჯისგან ულამაზეს ნამუშევრებს ქმნის… ახალგაზრდა ხელოვანს sheniinterieri.ge ესაუბრა:

“მოგესალმებით! მე ვარ სოფო მგალობლიშვილი, დავამთავრე სამხატვრო აკადემია ფერწერის ფაკულტეტი. ავეჯის და ინტერიერის დიზაინზე არც მიფიქრია… ხუთი წლის წინ დავიწყე ხელნაკეთი ნივთების შექმნა და მალევე გამიჩნდა ავეჯის რესტავრაციის ინტერესი. პირველი ნამუშევარი “ცხრაფოთლიანი გორკა” მეტად ღირებული და ძვირფასია – ის ჩემი დიდი ბაბუის იყო…

არაფერი ვიცოდი ამ სფეროზე, მაგრამ ამის მიუხედავად, შიში არ მქონია, რომ რამე გამეფუჭებინა. ყველაფრის გამოსწორება შეიძლება ხელოვნებაში. კეთების პროცესში ისეთი სიახლე და საინტერესო რამ შეიძლება აღმოაჩინო, რომ ეს გახდეს შენი წინსვლის და ახალი ეტაპის დასაწყისი… რაც მთავარია, შენს თავში იპოვნო ის დამალული ნიჭი, რომელიც დაგეხმარება სხვაგვარად შეხედო უსულო საგნებს და შენს წარმოსახვაში სიცოცხლე მიანიჭო მათ. ჩემი ნამუშევრები ძალიან მიყვარს, ისინი მეტ სიმყუდროვეს და სიამოვნებას მგვრი , ამ ყველაფრით ბედნიერი ვარ… ამიტომ დავარქვი ჩემს გვერდს ,,მყუდრო ”…”