რაც არ უნდა ლამაზი და დახვეწილი ინტერიერი გვქონდეს, ვფიქრობ, ერთი და იგივე კედლების ყურება დროთა განმავლობაში მაინც გვბეზრდება. იმისათვის, რომ გარდავქმნათ ინტერიერი და შევიტანოთ მასში ახალი სიცოცხლე, სულაც არ არის საჭირო დიდი ბიუჯეტი გვქონდეს.
გთავაზობთ მარტივ გზებს თუ როგორ განვაახლოთ ინტერიერი მინიმალური ხარჯებით:
- შექმენით აქცენტის კედელი
ოთახისთვის ახალი სიცოცხლის მინიჭება ძალიან მარტივია. ამისთვის მხოლოდ ერთი კედლის გადაღებვა დაგჭირდებათ. აქცენტის კედელს ძალიან მცირე ძალისხმევა სჭირდება, თუმცა მისი ეფექტი ინტერიერში შეუდარებელია. თავისი გამორჩეულობით ის ოთახში მყოფთა ყურადღებას მარტივად იპყრობს, ამიტომ ფერი დაკვირვებით უნდა შევარჩიოთ.
- შეცვალეთ თქვენი ავეჯის განლაგება
თუ დაიღალეთ თქვენი ოთახის სივრცული განლაგებით და სიახლე გჭირდებათ, ყველაზე ეკონომიური გზა არის ავეჯის გადაადგილება.
ხანდახან ინტერიერში ახალი დიზაინის მისაღებად, ავეჯის გამოცვლა კი არა, მისი სწორი კონფიგურაციის შემუშავება არის საჭირო.
- გამოფინეთ ხელნაკეთი ნივთები
იქნება ეს აბსტრაქტული ნახატი თუ ხელნაკეთი ვაზა, ინტერიერის განახლება უმარტივესად შეგიძლიათ მხოლოდ საკუთარი ძალისხმევით. ამისთვის უმჯობესია უკვე არსებული ნივთები გამოიყენოთ, რათა ხელი შეუწყოთ გარემოში ნარჩენების შემცირებას. არსებობს მრავალი გზა, რითაც ძველ ნივთებს შეგიძლიათ ახალი სიცოცხლე მიანიჭოთ.
სივრცეც ხომ მაშინ ხდება უფრო ძვირფასი და მიმზიდველი, როცა ირგვლივ საკუთარი შრომით შექმნილ ნივთებს ხედავთ?!
- დამალეთ კაბელები
ოთახში ყველაზე დიდი არეულობის გამომწვევი გადახლართული კაბელებია, რომლებიც ყველგანაა მიმოფანტული. იმისთვის, რომ დახვეწილი ლუქი შევინარჩუნოთ, შეგვიძლია შევიძინოთ საკაბელო ყუთები, რომლებიც იდეალურად მალავს სადენებს და ორგანიზებული და სუფთა ინტერიერის შენარჩუნებაში გვეხმარება.
- უყიდეთ საკუთარ თავს ყვავილები
როგორც მაილი საირუსმა თქვა, უყიდეთ თავს ყვავილები და დატკბით. არ არსებობს მიზეზი, რატომაც არ უნდა გაახალისოთ თქვენი სახლის ინტერიერი ახალი და სურნელოვანი ყვავილებით. თან შეგიძლიათ, ის ოთახის ფერთა პალიტრას შეუხამოთ და სივრცეში ახალი დეკორატიული ელემენტი შეიტანოთ.
- დაამატეთ დეკორატიული განათება
თუ მხოლოდ ჭაღით შემოიფარგლებით, ვფიქრობ, დამატებითი განათება განსაკუთრებით დაგეხმარებათ თქვენი სივრცის გარდაქმნაში. კედლისა და მაგიდის ნათურები, ტორშერები და სხვა დეკორატიული სანათები იდეალურია ოთახში რომანტიული, დამამშვიდებელი თუ სადღესასწაულო განწყობის შესაქმნელად.
Sheniinterieri-სთვის სტატია მოამზადა ფლორენციის დიზაინის აკადემიის კურსდამთავრებულმა, ინტერიერის დიზაინერმა, თაკო არდოტელმა.
❤️ თუ ინტერიერი შენი ინტერესის სფეროა, გაეცანი ჩვენი გვერდის სხვა სტატიებს💫
მასალის გამოყენების პირობები
